السنوات العشرة الاخيرة من حياة الملك العجوز !!
الملك امنحتب الثالث كان يعيش حياة هادئة وساب عناء الملكية في اواخر عهده لابنه وولي العهد اخناتون اللي شاركه الحكم عشرة سنوات ..حتي المراسلات الدولية في اواخر عهد الملك امنحتب الثالث كانت متوجهة لابنه مباشرة وكمان للمرأة الحكيمة تي .. وتخيلو لو احنا قلنا ان اخناتون شارك ابوه عشرة سنوات ..يعني اول خمس سنين من عصر اخناتون كان فيهم ضرب نار ..نقل عاصمة وتغيير اسماء وعداء مكشوف لكهنة امون ..كل دا بيحصل والملك العجوز امنحتب الثالث عايش في قصره في الملقطة !!
عاش الملك امنحتب الثالث اعتبارا من العام ٢٩ من عصره ولمدة عشرة سنوات في المقر الصيفي اللي كان ببخطط لبنائه اعتبارا من العام ١١ من حكمه ...يعني هو اخد ١٨ سنة عشان يبنيه ..وفي هذا المجمع احتفل الملك باول عيد سد ( مرور ٣٠ سنة علي جلوسه علي العرش ) بعد عام من اقامته في هذا المجمع ..وبرضه خلال الستة السنوات القادمة احتفل برضه بعيدين جلوسه علي العرش ( العام ٣٤ والعام ٣٧ من حكمه)
ومجمع مباني الملقطة اللي بناه امنحتب الثالث يقع جنوب مدينة هابو باربعة كيلومترات ..والمجمع ما اقتصرش بس علي قصر يعيش فيه الملك ..انما ضم مباني ومعابد ومقاصير وهو اكبر المباني الملكية في مصر القديمة ..وبيضم المجمع قصور ومعبد للاله امون وقاعة الاعياد او الاحتفالات ..ومجموعة فيلات للنبلاء القريبين من الملك ..ومذبح في الهواء الطلق ( مذبح كوم السماك ) ...وكل المباني دي مبنية بالطوب اللبن وللاسف ضاعت اغلبها ولم يتبق منها الا الاساسات وبقايا الجدران
واهم المباني والمبني المركزي في المجمع هو القصر وكان له اسم وهو ( دار السرور ) وبعد كده اخد اسم تاني وهو ( قصر اتون المبهر )
ويوجد شرق القصر بحيرة بيجيلها الماء من النيل عن طريق قنوات ..ودا عشان سهولة الوصول للقصر لان العاصمة موجودة في الناحية الشرقية
القصر بيضم قاعة مركزية وافنية وجناح للملك وغرف لعيلته ..وجناح الملك بيضم غرفة نومه وغرفة للملابس وقاعة عرش وغرف لحريمه ودي بعد عصر الملك امنحتب الثالث استخدمت كمخازن ..والقصر برضه كان فيه جناح للملكة تي ..وبيحيط بالقصر حدائق وبحيرة ..
وبالرغم ان القصر كان مبني بالطوب اللبن وضاعت الجدران والاسقف والاعمدة الخشبية التي تسند السقف الا ان البقايا التي عثر عليها توضح الزخارف التي كانت موجودة عليها ..فسقف غرفة نوم الملك كان يوجد رسوم للالهة نخبت ..والجدران كان عليها رسوم لزهور اللوتس والمستنقعات والطيور
وفي الناحية الشمالية من القصر يوجد معبد لامون ومذبح ..وتخيلو ان الخدم والموظفين اللي كانو بيخدمو في المجمع الضخم كانت ليهم اماكن يعيشو فيها
عاش الملك امنحتب الثالث في هذا المجمع عشرة سنوات فقط ولكن المجمع الملكي ظل باقيا حتي العصر الروماني ..اهمله اخناتون من اجل عاصمته الجديدة تل العمارنة والابتعاد عن كهنة امون.. ولكن توت عنخ امون اعاد الحياة فيه وعاش فيه فترة حكمه .. وربما سكن فيه الملك اي والملك حورمحب
